ثورة دينية و كده

ناس كتيرة “علمانية” جابتهم علي التايملاين لما السيسي إدي خطاب أن الأزهر محتاج “ثورة دينية”، عشان كل واحد فسرها بطريقته.  بس هم كلهم فهموها غلط الصراحة. عاوزين تعرفوا يعني إيه نعمل ثورة دينية بالنسبة للسيسى؟ يبقي أسألو نفسكم با لنسبة للسيسى يعني إيه تعمل ثورة.

عشان تبقي عملت ثورة، يبقي لازم تقبض علي أعداء الثورة، عشان أي ثورة لازم يبقي ليها أعداء، و القبض عليهم ده أثبات و أنجاز في نفس الوقت. زي القبض علي مبارك كده كان أثبات و أنجاز ثورة يناير كده. و القبض علي الأخوان أثبات و أنجاز تلاتين يونيو.

طب مين أعداء الثورة الدينية اللي حيتقبض عليهم؟ يووه..كتير. أي حد مش عاجبهم كلامه و حركاته أو يتعارض مع ثورة الاسلام الوسطي الجميل. يعني ناس في الأزهر مش تبعهم أو ميالين للأخوان ماشي، سلفيين ماشي، شباب في جامعة الأزهر ماشي. تمام كده معاك أخي العلماني؟ طب بس ماتنساش أنها ثورة دينية بتدافع عن نفسها ضد كل أعداء الاسلام الوسطي الجميل، يعني برضه نقبض علي بهائيين ماشي، شيعة ماشي، ملحدين ماشي و علمانين ماشي. إيوا طبعا. أحنا حنهرج؟ أمال حنسيبهم كده كأن ثورة لم تقم؟ أحنا بندافع عن الاسلام الوسطي الجميل ضد كل أعدائه من المتطرفين، و دول طبعا طالما مش بيتبعوه يبقوا أساسي من أعدائه و لازم يتقبض عليهم فورا. أمال يعني أحنا عملنا ثورة ليه؟

Leave a Reply

Your email address will not be published. Required fields are marked *